He whakamāoritanga o te whakaari hinapōuri a Hakipia mō te aroha pūhou i waenga i ētahi whānau toheriri e rua.
Whakaorangia ana i te pukapuka nei e tōna kaiwhakamāori e Te Haumihiata Mason te ao o Rōmeo rāua ko Hurieta ki te reo whakaatu i te wairua Māori.
Mauroa ana te kaingākautia o ngā whakaari a Wiremu Hakipia i te ao Māori – mai i ngā whakamāoritanga a Tākuta Pei Te Hurinui o Te Tangata Whai Rawa o Wēneti, o Othello me Julius Caesar ki ngā whakamāoritanga a Tākuta Merimeri Penfold i ngā oriori aroha a Hakipia. Whāia ana e Te Haumihiata tēnei tikanga i tana whakamāoritanga o Toroihi rāua ko Kāhira i whakaaritia ki te Whare Whakaari o te Globe i Rānana i te 2012, tahuri ana ki te whakaari a Hakipia mō te aroha whaiāipo hinapōuri e tino kaingākautia ana.
Te aroha, te tuku mātātahi, te tōwhare, te pākūhā – katoa atu kei a Rōmeo rāua ko Hurieta. Ka kawea ake te whakaari nei e tōna whakamāoritanga ki te manawa o Aotearoa.
Te Kaitito / Playwright
He kaitito whakaari, he kaitito toikupu, he kaiwhakaari a William Shakespeare (1564–1616). Ko ia te kaituhi kawenga nui katoa ki te reo Ingarihi, tata ana te whakawhitihia o ana whakaari ki ngā reo katoa me te kaha ake i ētahi atu kaitito whakaari te whakaaritia ki te kura, ki te atamira. Nō ngā tau 1590 i tuhia ai e Hakipia a Rōmeo rāua ko Hurieta, mai i taua wā taka mai ki nāianei, kua tino kaha te whakaaritia.
Te Kaiwhakamāori / Translator
I whānau mai a Te Haumihiata Mason (Tūhoe, Ngāti Pango, Te Arawa) ki ngā pāpāringa o Tauranga Moana, ka whakatipuhia ki te whārua o Ruatoki i roto o Tūhoe. Ko te reo Māori te reo o te hapori katoa i tōna tamarikitanga, i pono ai tōna ngākau ki te reo Māori. He wā hoki tērā i ora ai te whārua i ōna whenua, i ōna ngahere me ōna awa, me te aha, whakatōkia ana ki roto ki a Te Haumihiata te aroha ki te reo, ki ngā tini a Tāne, a Tangaroa, me te hiahia tonu ki te whakatipu i ngā momo mea katoa.
Ka whakahaungia e Tīmoti Kāretu kia haere ia ki te whare wānanga i ōna tau 30, nāwai ā, ka noho ia hei kaiako i te Tari Māori o Te Whare Wānanga o Waikato. Nō muri ka haere ia ki Te Taura Whiri, ka noho hei Kaitiaki Reo mō te motu. Ko tana pukapuka o nā tata nei, Te Rātaka a Tētahi Kōhine, tana whakamāoritanga o te Diary of a Young Girl a Anne Frank, i tohaina ki ngā kura o Aotearoa i te 2019.
William Shakespeare (Author) , Te Haumihiata Mason (Translated by)
Paperback / softback 320pp h210mm x w140mm x s27mm